भुइँमा पढ्छन् दलित विद्यार्थी
नुवाकोट, माघ ४ – भौतिक पूर्वाधार अभावमा यहाँको एक दलित समुदायमा खुलेको विद्यालयका विद्यार्थी चिसो भुइँमा बसेर अध्ययन गर्न बाध्य छन् ।
तीन वर्षअधि तारुका-५ चन्दनी नजिकको मिजार बस्तीमा दलित समुदायले जनश्रमदानमा खोलेको नमुना जनजागृति प्रावि भौतिक पूर्वाधारको अभावले अध्ययनरत विद्यार्थीहरू चिसो भुइँमा बसेर अध्ययन गर्न बाध्य भएका हुन् । आर्थिक स्रोतको अभावले समुदायका मानिसले विद्यालयलाई सरकारी स्वीकृति लिन सकेका छैनन् । स्वीकृति नहुँदा दरबन्दीका शिक्षकसमेत विद्यालयले पाउन सकेको छैन ।
‘विद्यालयलाई आर्थिक सहयोग मात्रै होइन, विद्यार्थीका लागि परालको गुन्द्रीसमेत जुटाउन सकिएको छैन,’ शिक्ष्ाक नारायणमान श्रेष्ठले भने । जिल्लाको एकमात्र दलित समुदायले खोलेको विद्यालयमा शिक्षा कार्यालयद्वारा वाषिर्क रूपमा उपलब्ध गराइने दुईवटा राहत कोटास्वरूप प्राप्त हुने केही रकमबाट प्रशासनिक खर्च र निजी स्तरमा शिक्षक राखिएको छ । तीन कक्षासम्म सञ्चालित विद्यालयमा गाउँका असी दलित बालबालिका अध्ययनरत छन् ।
‘हामीले ज्यालाबाट बचेको रकमले स्कुल बनायौं,’ व्यवस्थापन समितिका अध्यक्ष ठुले मिजारले भने । भौतिक सम्पत्तिमा परालको सुकुलसमेत नहुँदा कैयांै समय चिसो बाट विद्यार्थी प्रभावित भएको अध्यक्ष मिजारले बताए । केही साताअघि सांसद महेन्द्रबहादुर पाण्डेले विद्यालयलाई दस थान फर्निचर उपलब्ध गराए पनि त्यो अपुग छ । विद्यालयमा बस्ने सुविधा नहुँदा दैनिक बालबालिकाको स्कुल आउने चाहनासमेत घटेको अभिभावक सीता मिजारले बताइन् ।
दलित समुदायको शैक्षिक स्तर सुधार्न खाई-नखाई विद्यालय खोलियो तर त्यसमा विद्यार्थीका लागि चाहिने शैक्षिक सामग्रीदेखि आधारभूत आवश्यकताका सामानसमेत जोड्न नसकिएकोमा भने गाउँलेहरू दुःखी छन् । ‘दलित समुदायमा शिक्षास्तर राम्रो नहुँदा अहिलेसम्म एकजनाले पनि प्रवेशिका परीक्षा उत्तीर्ण गर्न सकेका छैनन्,’ शिक्षाक श्रेष्ठले भने ।
श्रोत: कान्तिपुर दैनिक[2063-10-05]
